債券投資 (2) – 實戰篇 直債, 槓桿直債操作

債券投資(1) 談論了債券的基本概念, 呢篇開始會講下債券投資的實戰技巧同和槓桿債券, 但講到實戰其實要講有排講, 由選債、公司基本面分析、財務分析、償債能力、市場利率走勢、債券Duration、融資成本、以至實戰落盤等等, 一講可能要講成年。但為左唔想悶親讀者, 等我先搵D interesting D既實戰案例同大家講解下, 學術既野之後慢慢再補充吧。講明先, 以下僅供參考, 不涉及推薦任何投資行為。

以上係阿里巴巴發行的債券, 阿里巴巴係咩公司我就唔多講啦, 大家都應該唔會陌生。大家從上可以見到呢隻債券既價格係96.729, 低於100, 我地叫做below par, 上一篇講過below par 既bond, 亦即係discount bond, 到期時你可收到100, 所以投資者如果以現價買入, 實際到期回報率(Yield to maturity)係比Coupon Rate大。如果你預期自己將會揸呢隻bond 揸到尾, 你應該主要考慮YTM, 而唔係淨係Coupon Rate, 而Coupon Rate只會影響你到期前期間收息既現金流。

 阿里巴巴發行的債券最主要的風險就是阿里巴巴違約, 以阿里巴巴這種規模既公司黎講, 違約可能性極低, 基本上可以話香港幾間本地中小型銀行執笠都未到佢。安全就安全啦, 但收益就得4%左右 (其實以這種級數既投資物黎講已經唔錯)。為左可以全面發揮呢類高評級債券既優勢, 可以利用槓桿直債操作(Leveraged Bond)。

Leveraged Bond原理，以上述例子, 其實係買入一隻4%回報既債券, 將之抵押予銀行,  利用銀行低息融資既優勢, 套現80%資金, 再將套出的資金再次買入該債券, 再將債券抵押予銀行融資, 將套現出的資金再度買入債券, 如此類推, 重複操作。當然實際操作唔使咁煩, 買入債券時直接付20%資金就可以買到100%面值既債券，其餘80% 由銀行融資,  槓桿比率就是1/20% = 5倍。以上做法就等如套息交易(Carry Trade), 借低息資金買入高息資產從而套取息差。



 

假設融資成本為1.6%, 買入4%回報的債券抵押予銀行, 以1.6%成本套現80%資金。如用盡5倍槓桿, 即可將原本4.02%年回報提升至13.72%年回報。

 

再續。