2021年9月2日 星期四

順豐收購嘉里物流之我見(中)


最近好多人DM我叫我分析下嘉里物流(636.HK),其實要分析既我之前都已經分析過,大家有時間可睇番半年前我寫果篇文章。「點解會升,點解會跌?」呢啲問題大家唔好再問我,要問問乜sir物sir果啲股壇高手啦,我真係唔識。我今次只是嘗試根據呢段時間既事態發展再綜合分析一下。

話說嘉里物流(636.HK)呢兩日又開始升浪,原因很簡單,有不少持有636的投資者應該都收到順豐收購股份的現金要約,反映順豐收購嘉里物流單交易完成在即,基本上官方審批都應該過晒,收購交易成功在望,最後唯一的不確定性是散戶覺得收購價太低或者太看好收購完成後的前景而不願意賣,使順豐最後無法在散戶手中收購足夠的股份,令其最終總收購的股份不足51.5%,繼而放棄收購。

我個人睇法係,一單咁大既deal,出晒公告,又開晒記招,連一般少有露面的順豐老闆王衛都出黎做下show,證明雙方對本身對這單交易的信心和決心。行到呢一步,股份收得夠唔夠應該都已經唔係關鍵,原因有二:第一,嘉里管理層都有不少option,該部份應該一早就傾好;第二,這段時間,甚至早在收購公佈前的一段時間,照理應該都會安排「友好」在市場幫手收貨,按道理點都有一定把握,只靠明刀明槍向散戶埋手咁兒戲,我個人不太相信。
正如我今年二月份時寫的文章分析,在交易正式完成前,正常情況下嘉里股價必然會在26蚊要約價以下,而主要應該會於23-24蚊波動。這很正常吧,市場價高於收購價,又怎會有散戶願意賣?保持低於要約價一個合理距離才會顯得收購價具吸引力。所以,嘉里物流股價一直在23-24蚊低位徘徊是十分「合理」的。

即使嘉里剛剛公佈半年業績好成咁,半年純利賺33.8億,按年升215.08%,就算撇除投資物業公平值變動,核心純利都有15.3億,管理層預計下半年業績能維持,當全年核心純利30億計,嘉里物流市值僅450億,PE都只有15倍,一啲都唔貴,未計收購完成後順豐和嘉里之間的具大協同效應。

以上咁既成績表,按年純利升兩倍幾都無事先發盈喜,只是在業績公佈日低調地如常公佈業績,原因顯然而見,你知我知,單眼佬都知,有時畫公仔唔使畫到出腸。

總結而言,嘉里物流既股價走勢係一如預期,一切按劇本走,大家等睇好戲。

相關文章:

從刁角度分析嘉里股價

1 則留言: